Árbæjarsafn Eldri nemendur 07.03.2017

Menning og mál

Leiðsögn fyrir erlenda nema í íslenskunámi, Íslenska fyrir útlendinga, um safnasvæði Árbæjarsafns. Miðuð að aldri og getu nemanda. Viðfangsefni heimsóknar er heimsókn í Suðurgötu 7 og gamla sveitabæinn Árbæ.

Heimsókn á Árbæjarsafn að vetri til er frábær upplifun

Mál og menning er samofin heild. Heimsókn á safn getur verið hjálpartæki í tungumálanámi og veitt innsýn inn í íslenskt menningarlíf. Í leiðsögninni kynnast nemendur sérstæðum orðaforða og málsniði.

Markmið

  • Að kynna sögu þjóðfélagsbreytinga sem áttu sér stað með þéttbýlisvæðingu í Reykjavík, upplifa aðstæður sveitafólks og borgarastéttar.
  • Að auka við menningartengdan orðaforða og skilning á íslensku samfélagi og menningu.
  • Að efla samfélagslega vitund einstaklingsins og hvetja til þátttöku í íslensku menningarlífi.

Tenging við námskrá

Í námskrá Mennta- og menningarmálaráðuneytis fyrir framhaldsfræðslu í íslensku fyrir útlendinga kemur fram mikilvægi þess að tengja saman námið og að kynnast menningarlífi landsins. Mál og menning er þannig samofin heild. Við gerð safnaefnis fyrir nemendur í íslenskukennslu voru námskrár Menntamálaráðuneytisins fyrir bæði grunnnám og framhaldsnám hafðar til hliðsjónar.

Kennsluefni / Kennslugögn

Kennurum stendur til boða orðalisti yfir þann sérstæða orðaforða sem tengist sýningum Árbæjarsafns. Hægt er að nálgast ítarefnið á vefsíðu Borgarsögusafnsins.

Undirbúningur fyrir heimsókn

Til að stuðla að góðri og vel heppnaðri heimsókn á safnið getur verið gott að fara yfir nokkur atriði:

  • Staðsetning safnsins: Árbæjarsafn er staðsett við Kistuhyl, 110 Reykjavík. Strætó nr.12, 16, 24 stoppar við safnið, einnig stoppar strætó nr.5, 6, 15 og 57 nálægt safninu.
  • Kynna sér viðfangsefni heimsóknarinnar með því að skoða safnsvæði á heimasíðu safnsins og upplýsingar um Árbæ og Suðurgötu 7.
  • Skoða orðaforða sem fylgir hér með sem ítarefni.
  • Gott getur verið að taka með sér myndavél ef fyrirhugað er að vinna úr heimsókninni að henni lokinni.

Skipulag heimsóknar

Hópurinn hittist við inngang safnsins við Kistuhyl. Efni og tilurð heimsóknarinnar er útskýrð stuttlega áður en leiðsögnin hefst. Í heimsókninni er fræðst um þær miklu þjóðfélagsbreytingar sem áttu sér stað með þéttbýlisvæðingu í Reykjavík á seinni hluta nítjándu aldar. Með stuttri göngu á milli húsa upplifa nemendur aðstæður sveitafólks og nýtilkominnar borgarastéttar við upphaf tuttugustu aldar.

Leiðsagnir og málfar er miðað að aldri, getu og skilning hópsins hverju sinni. Nemendur eru jafnframt hvattir til að koma með spurningar og athugasemdir á meðan heimsókn stendur.

Gengið saman um sýningarsvæði safnsins, niður að sveitabænum Árbæ og endað í Suðurgötu 7, sem er gamalt hús við torgið á safninu. Heimsókninni er lokið þegar hópurinn er komin aftur við inngang safnsins.

Úrvinnsla

Gagnlegt er að vinna úr heimsókninni fljótlega að henni lokinni, til dæmis næst þegar hópurinn hittist. Þetta eykur líkurnar á því að uppfylla markmið safnheimsóknarinnar og efla íslenskunám nemenda.

  • Nýta orðalistann. Jafnvel tengja einstök orð við hluti sem nemendur skoðuðu á safninu. Í tengslum við þetta er hægt að taka ljósmyndir af safngripum á meðan heimsókn stendur til að nýta síðar.
  • Upprifjun. Nemendur tala saman um það sem vakti athygli þeirra, hvað var áhugavert, hvað vissu þau ekki fyrir heimsóknina t.d.  Upprifjun getur verið á íslensku, móðurmáli nemenda eða öðru tungumáli.

Þarfnast síðan lagfæringar?

Látið okkur vinsamlegast vita

Skráðu þig á póstlista árbæjarsafns

Við sendum þér upplýsingar um viðburði, tilboð og fleira skemmtilegt.

Þarnast þessi síða lagfæringar

Þarfnast þessi síða lagfæringar?

Skyldu eftir netfang þitt og sendu okkur ábendingu um hvernig við getum bætt innihald þessarar síðu.