Forsíða / Ljósmyndasafn Reykjavíkur / Ljósmyndasafnið - Sýningar / Gunnar Rúnar Ólafsson – Yfirlitssýning
Salur
26.09.2015 - 00:00 til 10.01.2016 - 00:00

Gunnar Rúnar Ólafsson – Yfirlitssýning

Á sýningunni, Gunnar Rúnar Ólafsson – Yfirlitssýning, má sjá nýjar handstækkaðar ljósmyndir gerðar eftir filmum Gunnars, teknar á árabilinu 1947-1964. Auk þess verða sýnd valin myndbrot úr kvikmyndum Gunnars frá Kvikmyndasafni Íslands.

Ljósmyndasafn - Sýningar - Gunnar Rúnar

Gunnar Rúnar Ólafsson fæddist í Hafnarfirði 23 maí 1917. Hann lærði ljósmyndun í New York Institute of Photography sumarið 1945. Þaðan fór hann til Los Angeles og kynnti sér kvikmyndagerð hjá einu stærsta kvikmyndaveri Bandaríkjanna, Metro Goldwyn Mayer í Hollywood. Þar var hann viðstaddur upptökur fjölmargra kvikmynda og starfaði m.a. við hlið margra af þekktustu leikurum samtímans en þar er helst að nefna Judy Garland, Katharine Hepburn, Lana Turner og John Garfield. Þeim síðastnefndu kynntist Gunnar lítillega við upptökur á kvikmyndinni The Postman Always Rings Twice.

Eftir heimkomuna 1946 og fram til 1957 starfaði Gunnar einkum sem kvikmyndagerðarmaður en tók að auki ljósmyndir fyrir Morgunblaðið 1953–1957. Morgunblaðið var þá einn öflugasti og útbreiddasti fréttamiðill landsins en um leið málgagn Sjálfstæðisflokksins. Sjálfur hafði Gunnar verið virkur í félagsstarfi flokksins og sat um tíma í stjórn Stefnis, félagi ungra sjálfstæðismanna í Hafnarfirði.

Frá 1958 starfaði Gunnar sem iðnaðar- og auglýsingaljósmyndari og tók myndir fyrir einstaklinga, fyrirtæki og stofnanir. Hann myndaði m.a. fyrir Rafha hf, Hafnarfjarðarbæ og Akureyri auk þess að Sjálfstæðisflokkurinn og búnaðarfélög víða um land nýtt sér þjónustu hans. Þá myndaði Gunnar reglulega fyrir Reykjavíkurborg. Á þeim tíma hafði Sjálfstæðisflokkurinn hreinan meirihluta í borgarstjórn og áhrifafólk innan borgarinnar þekkti vel til natni Gunnars og listfengis. Í þeim verkefnum fékk markaðs- og auglýsinganef ljósmyndarans að njóta sín því Reykjavík, séð í gegnum myndavél Gunnars, er einkar viðkunnanleg borg, nútímaleg, vel skipulögð og björt. Snyrtilegir almenningsgarðar mynda fallega umgjörð um heilbrigt mannlíf og kraftmikil uppbygging á sér stað. Þarna má líka finna stórskemmtilegar myndir af börnum og unglingum bæði í leik og starfi.

Í filmusafninu eru um 27 þúsund myndir á filmum. Fyrstu árin notaðist Gunnar aðallega við 35 mm og 6×9 cm filmur en 1956 eignaðist hann góða Rolleiflex-myndavél sem fljótlega varð hans aðalsmerki. Við þessi umskipti varð nokkurs konar eðlisbreyting á myndheimi Gunnars og hið ferkantaða 6×6 filmusnið tók nær alveg yfir. Myndmálið varð meitlaðra en áður, rammarnir betur formaðir og hið listræna auga Gunnars kom enn betur í ljós.

Kvikmyndaefnið, 36 útgefnar og óútgefnar myndir af ýmsum stærðum og gerðum, er varðveitt á Kvikmyndasafni Íslands.

Gunnar Rúnar lést 29. janúar 1965, tæplega 48 ára gamall.

Upplýsingar

Upplýsingar

Ljósmyndasafn Reykjavíkur

Grófarhús, Tryggvagata 15, 6. hæð

101 Reykjavík

Sími: (+354) 411 6390

Hafðu samband

Opið

Opið

Mánudaga - fimmtudaga:

10:00 – 18:00

Föstudaga:

11:00 – 18:00

Helgar:

13:00 – 17:00

Lokað:

á uppstigningardag og sunnud.-mánud. í hvítasunnu og einnig 17. júní

Aðgangseyrir

Aðgangur

Fullorðnir

1.000 kr.

Börn 17 ára og yngri

Ókeypis

67 ára+ og öryrkjar

Ókeypis

Nemendur með gilt skólaskírteini

900 kr.

Menningarkort, árskort á borgarsöfnin

6.000 kr.

Þarfnast síðan lagfæringar?

Látið okkur vinsamlegast vita

Skráðu þig á póstlista ljósmyndasafnsins

Við sendum þér upplýsingar um viðburði, tilboð og fleira skemmtilegt.