Hansenshús - Smiðshús

Póshússtræti 15

arbaejarsafn_smidshus.jpg

Hansenshús stóð upphaflega austan við Dómkirkjuna í Reykjavík, í jaðri Austurvallar. Síðar var það skráð að Pósthússtræti 15. Húsið var reist um 1823 af Símoni Hansen kaupmanni, sem var af fyrstu kynslóð borgara í Reykjavík. Hansenshús er fulltrúi elstu timburhúsagerðar í Reykjavík. Það er einlyft, með háu risi og klætt utan borðum. Norðurhliðin er raunar án klæðningar nú og sést þar hvernig “múrað er í binding” eins og það var kallað, þ.e. múrsteini hlaðið í trégrind. Símon Hansen kaupmaður bjó í húsinu á árunum 1823-1847. Var húsið kennt við hann og nefnt Hansenshús. Venjulega bjuggu 10-11 manns í húsinu í hans tíð. Síðar bjó þar um langt skeið Teitur Finnboga-son, járnsmiður, og var húsið þá nefnt Teitshús. Ýmsir kunnir menn leigðu í Hansenshúsi um skemmri tíma, þar á meðal Jón Árnason þjóðsagna-safnari, Sigurður Guðmundsson málari og Sigfús Eymundsson ljósmyndari og bóksali. Búið var í húsinu fram á miðja 20. öld.

Hansenshús er elst þeirra húsa á Árbæjarsafni sem flutt hafa verið úr gamla miðbænum í Reykjavík. Það var einnig fyrsta húsið sem flutt var á safnið, en það gerðist árið 1960. Eftir flutninginn var húsið lengi kallað Smiðshús.

Unnið er að viðgerðum innanhúss og áætlað er að opna húsið fyrir gestum safnins vorið 2019.