back

Aðskotadýr - Listsýning Hlutverkaseturs

Aðskotadýr er listsýning Hlutverkaseturs og er viðfangsefni hennar samspil mannskepnunnar við lífríki sjávar og mengun hafsins. Plasti, pappír og ýmsu öðru sem fellur til úr almennu rusli er breytt í furðudýr sem hóta yfirtöku. Forseti Íslands herra Guðni Th. Jóhannesson mun opna sýninguna fimmtudaginn 1. september kl: 16:00. Sýningin verður opin til kl. 19 á opnunardegi.

Markmið sýningarinnar er að vekja athygli á losun úrgangsefna í sjóinn og stuðla að vitundarvakningu um hnattræna mengun.
Sýningarstjórn er í höndum Önnu Henriksdóttur listamanns og listkennara í Hlutverkasetri. Sýningin er samstarfsverkefni Hlutverkaseturs og Borgarsögusafns Reykjavíkur.

Sýningin er opin daglega kl. 10-17 út september. Aðgangur er ókeypis.

Aðgengi: Safnið er á tveimur hæðum og aðgengi fyrir hreyfihamlaða er gott, sérstaklega við inngang Grandagarðsmegin. Lyfta er á milli hæða. Leiðsöguhundar eru velkomnir í safnið.
Strætisvagn, leið 14, stoppar nálægt inngangi safnsins, Grandagarðsmegin.