back

Fjölskyldur njóti útiveru á Árbæjarsafni og í Viðey í haustfríinu

Borgarsögusafn hvetur fjölskyldur til að njóta útiveru í fallegu umhverfi Árbæjarsafns og Viðeyjar í haustfríinu og virða fyrir sér safnhúsin, listaverkin og náttúruna.

Í tilefni af haustfríinu hefur verið settur upp skemmtilegur leikur á safnsvæði Árbæjarsafns. Leikurinn gengur út á að finna alls átta miða í gluggum sex safnhúsa. Á miðunum er skemmtilegur fróðleikur um Ísland fyrr á tímum. Þegar gestir hafa lesið alla átta miðana er næsta skref að svara nokkrum laufléttum spurningum þessari síðu hér.

Um helgina er síðan um að gera að taka Viðeyjarferjuna frá Skarfabakka en hún siglir 3svar á dag á laugardögum og sunnudögum kl. 13:15; 14:15 og 15:15. Muna bara að síðasta ferjan til baka fer kl. 16:30. Í Viðey er góð aðstaða til skemmtilegrar útiveru og að sjálfsögðu almenningssalerni.

Þess má geta að hér á vef Borgarsögusafns er að finna mörg fróðleg og skemmtileg myndbönd sem upplagt er að kíkja á í haustfríinu. 

Vinsamlegast athugið að söfnin sjálf Árbæjarsafn, Landnámssýningin, Ljósmyndasafn Reykjavíkur og Sjóminjasafnið í Reykjavík eru lokuð vegna samkomutakmarkanna.

Góðar stundir í haustfríi og verið velkomin á safnsvæði Árbæjarsafns og Viðeyjar!