back

SÖFN BORGARINNAR OPIN þrátt fyrir samkomubann vegna kórónuveirunnar

Söfn Reykjavíkurborgar, Borgarsögusafn, Borgarbókasafn og Listasafn Reykjavíkur halda óbreyttum opnunartíma þrátt fyrir samkomubann en boðuðum viðburðum verður aflýst eða frestað frá og með mánudeginum 16. mars, á meðan samkomubannið er í gildi.

Á söfnum hafa gestir tækifæri til að hafa hæfilega fjarlægð sín á milli. Eina undantekningin er varðskipið Óðinn sem tilheyrir Borgarsögusafni, en því hefur verið lokað vegna þrengsla.

Engin hátíð á vegum borgarinnar er á dagskrá á næstu fjórum vikum en staðan verður metin varðandi Barnamenningarhátíð og aðrar hátíðir dragist samkomubannið á langinn.

Áfram verður lögð áhersla á aukin þrif í söfnum borgarinnar umfram venjubundna ræstingu. Snertifletir eru sérstaklega hreinsaðir að lágmarki tvisvar á dag, svo sem handrið, posar, snertiskjáir og hurðarhúnar, auk þess sem leikföng og annað sem börn hafa handfjatlað er hreinsað sérstaklega. Þrif hafa verið aukin um helgar og áhersla lögð á að tryggja gott aðgengi að handspritti, fyrir gesti og starfsmenn.

Hið vinsæla verk Chromo Sapiens í Listasafni Reykjavíkur - Hafnarhúsi er sömuleiðis þrifið vel og vandlega með sótthreinsiefni daglega og takmörkuðum fjölda hleypt inn í verkið hverju sinni. Hluti af varúðarráðstöfunum Borgarsögusafns er að loka leikfangasýningunni á Árbæjarsafni og eins öllum fjölskylduhornum.

Áhersla er sem fyrr lögð á að taka vel á móti öllum gestum.