Landnámssýningin - Lífið á landnámsöld

Á sýningunni er fjallað um landnám í Reykjavík og byggt er á fornleifarannsóknum sem fram hafa farið í miðbænum.

Miðpunktur sýningarinnar er skálarúst frá 10. öld, sem fannst þegar grafið var fyrir nýju húsi á horni Aðalstrætis og Túngötu. Búið var í skálanum frá því um 930 til 1000. Norðan við skálann fannst veggjarbútur sem er ennþá eldri, eða frá því um eða fyrir 871 og eru það elstu mannvistarleifar sem fundist hafa á Íslandi.

Margmiðlunartækni er notuð til að útskýra byggingarlag húsa á víkingaöld. Einnig er hægt að skyggnast inn í skálann með hjálp tölvutækni og ímynda sér hvernig lífi heimilsfólksins var háttað.

Á sýningunni er reynt að gefa hugmynd um umhverfi Reykjavíkur eins og það var við landnám. Þá eru sýndir munir sem fundist hafa við fornleifauppgröft í miðbæ Reykjavíkur.

Aðgöngumiðinn gildir bæði á á LANDNÁMSSÝNINGUNA í Aðalstræti 16 og á sýninguna REYKJAVÍK SAGAN HELDUR ÁFRAM í Aðalstræti 10, en sýningarnar eru samtengdar með göngum á milli húsanna.

Leiðsögn

Á sumrin er boðið upp á leiðsögn á ensku kl. 11 alla virka daga. Hljóðleiðsögn er í boði, á íslensku, ensku, frönsku, þýsku og norsku.

Hægt er að sérpanta leiðsögn fyrir hópa. Vinsamlegast hafið samband í síma 411 6370 eða pantið leiðsögn með því að senda tölvupóst á: landnam@reykjavik.is

Fjölskylduhornið

Landnámssýningin er fjölskylduvæn og býður upp á sérstakt fjölskylduhorn.

Leikur er nauðsynlegur bæði fyrir nútímabörn og þau sem lifðu fyrir þúsund árum síðan. Í fjölskylduhorninu okkar er að finna skemmtilega leiki og leikföng sem svipar til þeirra sem börn léku sér að á níundu öld. Þar er líka hægt að læra ýmislegt um lífið á landnámsöld.