Ester Jóhannesdóttir │Ljósrými – skuggarými

Með aukinni náttúrulegri birtu verður ljósmyndun auðveldari og aðgengilegri og andstæður verða skýrari eftir því sem myrkrið verður minna. Athöfnin að ljósmynda eða mynda ljós á sér margar birtingarmyndir.

Sýningin Ljósrými – skuggarými byggir á yfirstandandi rannsókn Esterar Jóhannesdóttur á ljósmyndun í afmörkuðu rými. Hún leitast við að ljósmynda birtu og skugga í innviðum bygginga með náttúrulegri lýsingu, en einnig úti með rafmagnsljósi. Með því vill Ester skoða hvaða áhrif birtan/ljósið, náttúrulegt eða rafmagns, hefur á rýmið og myndina. 

Ljósið er frumkraftur í náttúrunni og grundvöllur ljósmyndunar ásamt myrkrinu – því án þess væri ekkert ljós. Að búa í landi andstæðna þar sem birtumagnið er mikið á sumrin en af skornum skammti á veturna hefur gríðarleg áhrif á fólk.

Í myndunum leikur Ester sér að frumformunum með ljósinu og bilinu á milli þessara andstæðna. Við það verða til abstrakt form og skuggar verða greinilegri í afmörkuðum ramma myndflatarins þar sem hið ljóðræna er aldrei langt undan.

Sýningin veltur upp tilvistarlegum spurningum sem vakna út frá ljósi og formum í ljósmyndun ásamt því að velta fyrir sér hvernig sköpunarþráin tengist því hvernig mannkynið hefur þraukað á jörðinni.

Ester Jóhannesdóttir útskrifaðist með MFA gráðu frá University of Leeds árið 2010 og hefur fengist við listsköpun í yfir 30 ár.