Horfur

Charlotta María Hauksdóttir

Verkið ​Horfur​ var unnið á Íslandi haustið 2015 þar sem við fjölskyldan dvöldum tímabundið. Fyrir utan svefnherbergisgluggann var garður með miklum gróðri sem ég fékk strax áhuga á að mynda. Við hliðina á glugganum var segultafla sem á hékk lítil vatnslitamynd og fékk ég hugmynd um að hengja myndir á töfluna, bæði fréttamyndir og persónulegar myndir. Það sem vakti áhuga minn var samspilið milli þess sem var að gerast úti í heimi, fyrir utan gluggann og í lífi fjölskyldunnar.

Á þessum fjórum mánuðum fylltist taflan smám saman, á meðan gróðurinn hopaði fyrir vetri. Yfir þennan tíma tók ég 80 myndir og er því einungis sýnishorn af verkinu hér í Skotinu. Ég hafði gert áþekkt verk á árunum 2008-­2009 sem ég setti fram í handgerðri bók sem sýnd var í Ljósmyndasafni Reykjavíkur, Þjóðminjasafninu og nú síðast í Susan Eley Fine Art í New York.

Charlotta María Hauksdóttir er fædd í Reykjavík en býr nú og starfar í Palo Alto, Kaliforníu. Hún útskrifaðist með Master of Fine Art gráðu í ljósmyndun árið 2004 frá San Francisco Art Institute og BA gráðu frá Istituto Europeo di Design á Ítalíu árið 1997. Charlotta hefur haldið einkasýningar og tekið þátt fjölmörgum samsýningum bæði í Evrópu og í Bandaríkjunum. Hennar myndir má finna bæði í opinberri og einkaeigu víðsvegar um heim og hafa birst í fjölmörgum bókum og tímaritum.