Julie Fuster - Höfnin

Sýningin Höfnin, samanstendur af 5 ljóðum, 5 ljósmyndum og 5 smásögum. Hvert þema táknar eina árstíð, frá vetri til vetrar. Þau gefa innsýn í óreiðukennt minni höfundar yfir eins árs tímabil sem flakkar um íslenskt landslag og reynir að komast inn í fortíðina.

Í verkum sínum leitast Julie við að tjá hve viðkvæmt tilfinningalíf okkar er og hversu mikil áhrif náttúruöflin, ljós og landslag hafa á hugsun okkar og hugarfar.
 

„Ég flutti til Reykjavíkur árið 2014 og bjó þar í heilt ár. Í byrjun var ég ringluð og hugsandi, ég eyddi frítíma mínum við ritstörf og ljósmyndun. Ég bjó og vann í námunda við höfnina og veitti það svæði mér mikinn innblástur. Þegar ég fór yfir verk mín í ársbyrjun 2015 tók ég eftir ákveðnu mynstri, bæði ljóð mín og ljósmyndir túlkuðu tilfinningar mínar sem sveifluðust í takt við árstíðarnar á umbrotatíma í lífi mínu.“

Julie Fuster (f.1988), er fædd og uppalin í Frakklandi. Hún útskrifaðist með gráðu í heimspeki og listforvörslu frá Ecole du Louvre árið 2013. Julie vinnur við listinnrömmun, í frítíma sínum glímir hún við ritlist og ljósmyndun. Hún hefur ástríður fyrir alþýðulist og list í almannarými, þá sérstaklega áhugaljósmyndun.

Nýverið var fyrsta ljóðabók Julie, Plus la neige tombe sur le ciment, gefin út í Frakklandi af forlaginu Editions Main Soleil. Höfnin er hennar fyrsta sýning.