Litapalletta tímans│Litmyndir úr safneign 1950-1970

Á sumarsýningu Ljósmyndasafns Reykjavíkur 2023 verða sýndar litmyndir úr safnkosti frá tímabilinu 1950-1970 þegar litljósmyndun fór að festa rætur á Íslandi.

Þótt fyrstu litljósmyndirnar sem teknar voru á Íslandi, svo vitað sé, hafi verið teknar 1901, fór mjög lítið fyrir litljósmyndun vel fram yfir 1950.

Hinn svarthvíti heimur sem sjá má á myndum fram að þeim tíma er sjónhverfing. Lífið var vissulega í lit, klæðnaðurinn litríkur, bílarnir grænbláir, vínrauðir, jafnvel gulir og húsþökin ýmist rauð eða græn – himininn mismunandi blár! Litapaletta tímans er síbreytileg; mótuð af tísku, tækni, minningum og tíðaranda, jafnvel af miðlinum sjálfum.

Á sýningunni Litapalletta tímans verða nýjar stækkanir gerðar eftir upprunalegum litfilmum og litskyggnum. Allt myndir úr safnkosti Ljósmyndasafns Reykjavíkur teknar af fjölbreyttum hópi íslenskra sem erlendra ljósmyndara. Á meðal þeirra eru til að mynda: Hermann Schlenker, Ingibjörg Ólafsdóttir, Helga Fietz, Sigurður Demetz Franzson, Hannes Pálsson, Adolf Karlsson og Böðvar Pétursson.

Sýningin verður opnuð laugardaginn 3. júní kl. 15. Öll velkomin!