Stefnumót– Norræn ljósmyndun út yfir landamæri

Á sýningunni er að finna ljósmynda- og vídeóverk fimm norrænna samtímaljósmyndara/listamanna, þeirra Báru Kristinsdóttur (Íslandi), Nanna Debois Buhl (Danmörku), Sandra Mujinga (Noregi), Johannes Samuelsson (Svíþjóð) og Miia Autio (Finnlandi).

Félagslegur og/eða pólítískur undirtónn einkennir verkin en í þeim eru kannaðar leiðir við að myndgera „stefnumót“ viðfangsefna og með því beind athygli að málum sem eru ofarlega á baugi í samfélagslegri umræðu í dag– hvort sem um er að ræða innflytjendamál, breytingar í landslagi og borgum eða staðbundnar afleiðingar alþjóðavæðingar.

Sýningin er útkoma samvinnu sýningarstjóra og stofnana frá Norðurlöndunum fimm, þeirra Jóhönnu Guðrúnar Árnadóttur, Ljósmyndasafni Reykjavíkur,  Kristine Kern, Fotografisk Center í Kaupmannahöfn, Danmörku, Tiina Rauhala, Finnska Ljósmyndasafnið í Helsinki, Finnlandi. Susanne Saether, Henie Onstad Art Center, Osló, Noregi og Sara Walker, Louise Wolthers og Dragana Vujanović Östlind, Hasselbladstofnuninni í Gautaborg, Svíþjóð.

Sýningin var sett upp fyrr á árinu í Hasselblad Center í Gautaborg (23. febrúar – 5. maí) og  Fotografisk Center í Kaupmannahöfn (8. júní – 18. ágúst).