VIGGO MORTENSEN - SKOVBO
Það er Ljósmyndasafni Reykjavíkur mikill heiður að kynna sýningu á verkum Viggo Mortensen – SKOVBO. Heiti sýningarinnar,SKOVBO, kemur úr öðru móðurmáli ljósmyndarans, dönsku, og gæti útleggst sem skógarbýli eða í víðara samhengi – það að eiga heima í skóginum.
/*php $markup = $content['field_mynd_stor'][0]['#markup']; $markup = str_replace('typeof="foaf:Image"', 'typeof="foaf:Image" class="lightbox"', $markup); $content['field_mynd_stor'][0]['#markup'] = $markup; */?>
Margir tengja eflaust nafn þessa fjölhæfa listamanns fremur við leiklist en ljósmyndun en hann hefur notið mikillar velgengni sem kvikmyndaleikari og hlaut nýverið tilnefningu til hinna eftirsóttu Óskarsverðlauna. Viggo finnur sköpun sinni farveg í fleiri en einni listgrein og blandar þeim einnig gjarnan saman. Þannig er leiklistin aðeins hluti af stærri heild en hann hefur um árabil lagt stund á ljósmyndun við góðan orðstír ásamt listmálun, ljóðagerð og tónlist.
Viggo Mortensen hefur ferðast víða og búið á mörgum mismunandi stöðum um ævina og notar hann, þar af leiðandi, sitt nánasta umhverfi þar sem hann er hverju sinni sem efnivið fyrir ljósmyndir sínar. Hvort sem viðfangsefnið er agnir sólargeisla að brjótast inn í þykkan laufskrúð trjáa í Kraká í Póllandi, maður að klifra upp stiga í Úralfjöllum, sólþurrkaður runni í Nýju Mexíkó eða sef í skógarjaðri á Mið-Sjálandi, má greina sterklega í ljóðrænum og draumkenndum ljósmyndum hans hvernig hann sjálfur skynjar heiminn.
Samnefnd bók er gefin út meðfram sýningunni en í kynningu á henni segir:
Í þessu nýja mynda- og ljóðasafni eru tré og minningin um tré, vofur, orð, nætur, daga, líf, dauða og öruggt skjól fyrir allt þetta á stað þar sem kvistir verða að greinum, / og margt býr í þokunni… (Osip Emilyevich Mandelstam). Ef þú þorir ekki inn í skóginn, eða finnur hann ekki, gætir þú ef til vill fundið eitt tré, eða stað sem tré væri að finna og einfaldlega staldrað við eitt þögult augnablik til að sjá hvað gerist.
Árið 2002 setti Viggo á fót útgáfufyrirtækið Perceval Press þar sem hann leggur áherslu á hugðarefni sín, listir, ljósmyndun, ljóðagerð og bókmenntir. Eins og mörgum Íslendingum er kunnugt kom þar út eigi alls fyrir löngu listaverkabók með verkum Georgs Guðna. Á meðal ljósmyndabóka á verkum hans sjálfs hafa komið út Recent Forgeries (Smart Art Press, 1998) SignLanguage (Smart Art Press, 2002), Coincidence of Memory (Perceval Press, 2002), Hole In The Sun (Perceval Press, 2002) og núna síðast bókin SKOVBO sem gefin er út í tengslum við sýninguna sem nú er sett upp í Ljósmyndasafni Reykjavíkur.