Aðgengi á Árbæjarsafni

Árbæjarsafn

Kistuhyl, 110 Reykjavík, sími 411 6304

Árbæjarsafn er útisafn á stóru safnsvæði. Þar eru yfir 20 hús opin gestum á opnunartíma safnsins. Upphaflega var aðeins eitt hús á safnsvæðinu (Árbær), en öll hin húsin hafa verið flutt þangað, flest frá miðbæ Reykjavíkur. Húsin eru jafn margbreytileg og þau eru mörg, í sumum þeirra eru lítil rými og þröngir stigar en í öðrum eru stærri salir.

Starfsfólk safnsins þekkist á því að það klæðist búningum frá fyrri tímum. Í miðasölu er alltaf starfsmaður sem getur aðstoðað og gefið upplýsingar.

Opnunartímar safnsins eru mismunandi eftir árstíðum, nánari upplýsingar hér

Tímalengd heimsóknar: 1-2 klst.

Heimsókn í safnið

Bílastæði eru við inngang safnsins. Hægt er að stöðva bíl við miðasöluhúsið til að hleypa farþegum út og inn.

Almenningssamgöngur

Strætisvagnar nr. 12 og 24 stoppa á Höfðabakka, rétt við safnið. Vagn nr. 16 stoppar við Streng (5 mín. gangur) og nr. 5 við Rofabæ (6 mín. gangur).

Inngangur

Gengið er inn í safnið gegnum miðasöluna. Þar er safnbúð og starfsfólk sem getur gefið upplýsingar um safnið. Gengið er út úr miðasölu á opið grassvæði eða torg. Við torgið standa nokkur hús og þaðan liggja gangstígar innar á safnsvæðið.

Gangstígar á safnsvæðinu eru flestir sléttir malarstígar en sums staðar eru hellulagðar stéttir. Í votviðri myndast pollar á gangstígum og í frosti geta þeir verið hálir þó að þeir séu sandaðir reglulega. Hægt er að fá lánaða mannbrodda í afgreiðslu. Safnsvæðið liggur að hluta á jafnsléttu en lækkar í átt að Elliðaám svo göngustígar liggja víða í aflíðandi brekkum.

Salerni eru í þremur húsum: Landakoti, Lækjargötu 4 og Kornhúsi, auk Dillonshúss þegar það er opið.

Dýr: Á safninu búa hænur sem ganga lausar um safnsvæðið allan ársins hring. Yfir sumarmánuðina eru einnig önnur húsdýr innan girðinga á svæðinu, til dæmis kindur og hestar. Hundar (aðrir en leiðsöguhundar) eru ekki leyfðir á safnsvæðinu.

Barnakerrur eru ekki í boði á Árbæjarsafni en gestum er velkomið að koma með sínar eigin kerrur og vagna á safnið. Skiptiborð er á salernum í Landakoti.  

Nestisaðstaða með borðum og áföstum bekkjum er á tveimur stöðum á útisvæði safnsins: ein er við torgið og önnur vestan megin á safnsvæðinu (þar er einnig kolagrill). Einnig er nestisaðstaða með borðum og stólum innandyra í Landakoti.

Kaffihús er í Dillonshúsi á sumrin. Sunnan megin við húsið er pallur með garðhúsgögnum. Húsið skiptist í þrjár misstórar stofur og þar er einnig salerni.

Fundaraðstaða og útleiga er í fjórum húsum safnsins. Árbæjarkirkja er leigð til athafna. Fundarsalir og útleiga eru í Dillonshúsi, Kornhúsi (efri hæð) og Lækjargötu 4 (1. hæð).

Leiðsögn er í boði fyrir safngesti á hverjum degi kl. 13. Leiðsögnin er á ensku og íslensku sé þess óskað.

Upplýsingar um sögu hvers húss og myndir eru hér

Hreyfihamlaðir

Bílastæði fyrir hreyfihamlaða

Fimm bílastæði fyrir hreyfihamlaða eru 50 metra frá inngangi safnsins og er gönguleið frá þeim að miðasölu hituð með snjóbræðslukerfi.

Inngangur

Gengið er inn í safnið gegnum miðasölu en einnig er hægt að biðja starfsfólk að opna hlið við miðasöluhúsið og fara þar inn á safnsvæðið. Hurðir á miðasölu opnast sjálfkrafa og stigið er yfir þröskuld.

Gangstígar á safnsvæðinu eru flestir sléttir malarstígar en sums staðar eru hellulagðar stéttir. Í votviðri myndast pollar á gangstígum og í frosti geta þeir verið hálir þrátt fyrir að vera sandaðir reglulega.

Bekkir og aðstaða til að setjast niður

Bekkir eru á ýmsum stöðum á útisvæði safnsins og inni í mörgum húsum er hægt að setjast niður, t.d. í Landakoti, Lækjargötu 4, miðasölu, kirkju og Líkn.

Salerni með aðgengi fyrir fatlaða er í Landakoti.

Hús safnsins

Inn í flest húsin er gengið upp eitt þrep eða yfir þröskuld. Hér á eftir fylgir lýsing á þremur húsum.

Landakot

Aðgengi að Landakoti er gott. Hiti er í stéttum og rampur liggur að lyftu fyrir hjólastóla. Lyftan er læst og þarf aðstoð starfsfólks til að nota hana. Á fyrstu hæð hússins er salerni fyrir fólk í hjólastólum, nestisaðstaða og sýning. Dyraop í húsinu eru víð og passa fyrir hjólastóla.

Stigi er í húsinu upp á sýningu á efri hæð og einnig niður í kjallara þar sem stundum er opið fyrir gesti að skoða sýningu. Kjallarinn er aðgengilegur fyrir hjólastóla að utan með aðstoð starfsfólks sem getur opnað þann inngang sérstaklega.

Lækjargata 4

Gengið er inn í húsið upp eitt þrep og yfir þröskuld. Færanlegur trérampur er inni í húsinu sem er hægt að leggja á stéttina fyrir framan húsið. Á 1. hæð eru tvö rými með setuaðstöðu auk salernis fyrir gesti þegar rýmin eru ekki í útleigu. Breiður stigi með handriði er upp á sýningu á 2. hæð. Inni á sýningunni eru stólar fyrir gesti.

Kornhús

Gengið er inn í Kornhús yfir háan þröskuld. Færanlegur rampur er við húsið fyrir létta hjólastóla. Rampurinn er þungur og þarf aðstoð starfsfólks við að koma honum fyrir.

Salerni er í húsinu, en ekki fyrir hreyfihamlaða. Á 1. hæð eru tímabundnar sýningar með breytilegum sýningartímum sem getur verið allt frá fáeinum mánuðum upp í nokkur ár. Stigi liggur upp á efri hæð í húsinu. Efri hæðin er notuð fyrir útleigu og fundahald og er því oft lokuð gestum nema þegar um viðburði er að ræða.

 

Vinsamlegast hafið samband í síma 411-6300 eða sendið póst á borgarsogusafn@reykjavik.is fyrir frekari upplýsingar. 

Einhverfir og fólk með skynúrvinnsluvanda

Áreiti

Áreiti í Landakoti getur verið nokkuð vegna bergmáls þegar margir gestir eru inni. Í sumum húsum eru sýningar með hljóði og myndböndum. Í Lækjargötu 4 (efri hæð) er t.d. sýning með tónlist og litlum skjáum með myndböndum.

Kyrrlátir staðir eru margir bæði inni og úti á Árbæjarsafni og áreiti á safninu á almennum opnunartíma er lítið.

Borgarsögusafn auglýsir reglulega sérstaka opnunartíma fyrir einhverfa og fólk með skynúrvinnsluvanda. Þá er áreiti á sýningum stillt með þarfir hópsins í huga (t.d. ljós og hljóð).

Vinsamlegast hafið samband í síma 411-6300 eða sendið póst á borgarsogusafn@reykjavik.is fyrir frekari upplýsingar. 

Blindir og sjónskertir

Leiðsöguhundar

Leiðsöguhundar eru velkomnir í safnið.

Lýsing

Ljósastaurar eru nokkrir á safnsvæðinu en lýsing getur verið takmörkuð á safninu yfir myrkasta tíma ársins.

Leiðsögn

Borgarsögusafn auglýsir reglulega fyrir blinda og sjónskerta á sýningarstöðum safnsins. Tímasetning hverrar leiðsagnar er auglýst með góðum fyrirvara.

Vinsamlegast hafið samband í síma 411-6300 eða sendið póst á borgarsogusafn@reykjavik.is fyrir frekari upplýsingar.

Heyrnarskertir og heyrnarlausir

Borgarsögusafn auglýsir reglulega döff leiðsögn á táknmáli á sýningarstöðum safnsins. Tímasetning hverrar leiðsagnar er auglýst með góðum fyrirvara.

Vinsamlegast hafið samband í síma 411-6300 eða sendið póst á borgarsogusafn@reykjavik.is fyrir frekari upplýsingar. 

Ýmsir hópar

Borgarsögusafn er eitt safn á fimm stöðum (Árbæjarsafn, Landnámssýning, Ljósmyndasafn, Sjóminjasafn og Viðey) og tekur á móti fjölbreyttum hópum. Leitast við að hlusta eftir þörfum þeirra eftir fremsta megni. Hefur þinn hópur heimsótt safnið?

Meðal þeirra sem koma reglulega á safnið eru:

Klúbburinn Geysir

Hlutverkasetrið

Dagþjálfun fólks með heilabilun

Vinsamlegast hafið samband í síma 411-6300 eða sendið póst á safnfraedsla@reykjavik.is fyrir frekari upplýsingar.