Ljós­mynda­safn

Verið velkomin í skapandi skugga- og klippismiðju fyrir börn og fjölskyldur á Ljósmyndasafninu á Safnanótt, föstudaginn 6. febrúar kl. 18-20. Ókeypis inn og öll velkomin! Smiðjan tengist sýningunni Sofandi risar þar sem Kristján Maack sýnir myndir af jöklum þar sem „sofandi risar“ verða til og hverfa. Í smiðjunni klippum við út allskyns verur og jökla og skoðum hvernig skuggamyndir verða til. Smiðjan er opin og sveigjanleg – komið þegar ykkur hentar og takið þátt á ykkar hraða. Viðburðurinn er hluti af dagskrá Borgarsögusafns á Safnanótt.

Verið velkomin á sýningu Fókus – Félags áhugaljósmyndara á Ljósmyndasafni Reykjavíkur á Safnanótt, föstudaginn 6. febrúar kl. 18-22. Ókeypis inn og öll velkomin! Ljósmyndararnir á bakvið sýninguna verða á svæðinu til að spjalla um sýninguna og félagið. „Hreyfing“ nefnist fyrsta sýning félaga úr Fókus – Félagi áhugaljósmyndara sem mun taka yfir sýningarrýmið SKOTIÐ árið 2026. Orðið „hreyfing“ má túlka í ljósmynd á mismunandi vegu, til dæmis með því að frysta hreyfingu í mynd, fylgja hreyfingu eftir með myndavélinni, eða taka myndir af ýmsum „hreyfingum“ samfélagsins, svo sem verkalýðshreyfingu eða mótmælahreyfingu. Sýnendur eru: Dagþór Haraldsson Geir Gunnlaugsson Ósk Ebenesersdóttir Ólafur Magnús Håkansson Sveinn Aðalsteinsson Þorsteinn Friðriksson Jafnframt verður á skjá myndasyrpa frá Fókus félögum sem kallast "Með sól í hjarta", þetta er 15 mínútna sýning sem mun rúlla stöðugt allt kvöldið. Viðburðurinn er hluti af dagskrá Borgarsögusafns á Safnanótt.

Verið velkomin í leiðsögn um sýninguna Sofandi risar með Kristjáni Maack á Ljósmyndasafni Reykjavíkur. Leiðsögnin fer fram á Safnanótt, föstudaginn 6. febrúar kl. 18:30. Ókeypis inn og öll velkomin! Sofandi risar fjalla um hina örlagaríku tíma sem við lifum á. Í náttúrunni búa sofandi risar sem smátt og smátt eru að vakna til lífsins. Djúpt í iðrum náttúrunnar stendur tíminn kyrr svo árþúsundum saman og varðveitir þar tímann og kjarnann í náttúrunni. Um þúsaldir geymist vatnið og súrefnið og allar öreindir landsins á hinum fullkomna stað, undir þungu fargi sjálfs síns til þess að varðveita upprunann. Í myrkrinu og kuldanum varðveitist kjarninn best, tíminn hefur stöðvast í milljónir ára og bíður þess sem verða vill. Massinn og fargið hefur áhrif á allt í kringum sig, nærir og kæfir allt umhverfið sitt með eiginleikum sínum. Íslenskir jöklar eru að hverfa. Ef skyggnst er innst inn í kjarna jökuls þá má þar finna allt sem var, andrúmsloft, vatn, ryk, flóru, og allar hinar minnstu öreindir alheimsins. Þetta er allt geymt í frystigeymslu náttúrunnar. Viðburðurinn er hluti af dagskrá Borgarsögusafns á Safnanótt.

Ertu að læra íslensku? Borgarsögusafn býður upp á leiðsögn um Ljósmyndasafnið fyrir fólk sem er að læra íslensku. Leiðsögnin verður laugardaginn 14. febrúar kl. 14:00-15:00. Katleen Abbeel segir frá á auðskilinni íslensku. Leiðsögnin verður um sýninguna Sofandi risar eftir Kristján Maack. Á sýningunni eru myndir af jöklum þar sem „sofandi risar“ verða til og hverfa. Katleen Abbeel talar íslensku sem annað mál. Hún er leiðsögumaður, þýðandi og íslenskukennari. Safnið er góður staður til að æfa íslensku. Leiðsögnin er ókeypis og er fyrir fólk sem er að læra íslensku, bæði fyrir byrjendur og þau sem kunna meira. Nánari upplýsingar um sýninguna: https://borgarsogusafn.is/.../kristjan-maack-sofandi-risar