Ljósmyndasafn

Franski ljósmyndarinn Grégory Gerault kom fyrst til Íslands árið 2002. Sú heimsókn hafði mikil áhrif á hann að hann hefur komið hingað í ein 20-30 skipti síðan. Sýningin "Myceland" er afrakstur þessara ferða, hans sýn á Ísland. 

Í texta Ásdísar Ólafsdóttur listfræðings um sýninguna segir: 

„Grégory hefur gert að sínu landið, fólkið og lífsmynstur þess og hann horfir ekki á það utan frá heldur að innan með skilningi þess innvígða. Það er væntumþykja í augnaráði hans, eins og sonar sem horfir á aldraða foreldra eða á bernskuslóðir sínar. „Myceland“ Grégorys er bæði kunnuglegt og framandi, hans og okkar. … 

Landslagsmyndir hans gefa ríka tilfinningu fyrir grýttri jörðinni, stórskorinni fegurðinni, þrúgandi himninum, rokinu, fjarlægð sjóndeildarhringsins og víðáttunni, en líka blæbrigðum lita og efnis, eins og viðkvæmni mosans og gróðursins sem nær að vaxa þrátt fyrir allt. Smæð mannlegrar viðvistar og um leið viðleitni mannsins til að setja mark sitt á stórbrotið landslagið eru tákngerðar með vegskiltum, sæluhúsum, einangruðum byggingum og eyðibýlum. Þótt Grégory taki líka myndir fyrir ferðamannabæklinga og tímarit gerir þessi sterka tenging hans við landið það að verkum að hann nær að fara út fyrir svið glansmynda og koma til skila þeim kjarna sem er óháður hinni viðteknu fegurð.  … 

Fegurð ljósmyndar felst oft í því að viðfangsefnið er gert allt að því óhlutstætt með afmörkun myndflatarins og auga ljósmyndarans. Alheimsleg fegurð fjalls, bugðu á vegi eða í vatni, bullandi leirhvers eða fara eftir barnavagn í nýföllnum snjó er hafin yfir stað og stund með auga þess sem á hana horfir og sem færir okkur hana að gjöf.“ 


Grégory Gerault│Myceland

"Myceland" er yfirskrift sýningar í Skoti Ljósmyndasafns Reykjavíkur með verkum Grégory Gerault

Grégory Gerault│­Myce­land

"Myceland" er yfirskrift sýningar í Skoti Ljósmyndasafns Reykjavíkur með verkum Grégory Gerault

Grégory Gerault│Myceland