Borg­ar­sögu­safn
Sagan okkar

Leiðsögumaður fer með gesti í öll helstu hús Árbæjarsafns og segir frá sögu þeirra. Leiðsögnin fer að mestu fram á ensku og tekur rúma klukkastund.

Verið velkomin á opnun sýningarinnar Vatn í Skotinu á Ljósmyndasafni Reykjavíkur föstudaginn 6. nóvember kl. 16-18. Veitingar í boði. Vatn nefnist sjöunda sýning félaga úr Fókus félagi áhugaljósmyndara sem mun taka yfir sýningarrýmið SKOTIÐ árið 2026. Sýningin er jafnframt lokasýning ársins á vegum Fókus. Á Vísindavef Háskóla Íslands er að finna eftirfarandi skýringu á því hvað er vatn: „Vatnið er í samfelldri hringrás: það gufar upp úr sjónum á suðlægari breiddargráðum, berst inn yfir landið þar sem það þéttist og fellur til jarðar, streymir aftur til sjávar í vatnsföllum eða berst niður í berggrunninn sem grunnvatn - og þaðan til sjávar aftur með tímanum.” Á þessari sýningu sjáum við ljósmyndara fanga ýmiss konar birtingarmyndir vatnsins bæði í föstu og fljótandi formi. Þar sem það lemur ströndina, flæðir til hafs eða er í föstu formi og bíður geisla sólar til að leysa sig úr fjötrum. Sýnendur eru: ● Arngrímur Blöndahl ● Brynja Jóhannsdóttir ● Finnur P Fróðason ● Jóhann Guðni Reynisson ● Jóhanna Ingimundardóttir ● Lárus St. Guðmundsson ● Sigríður Jóna Kjartansdóttir

Ertu að læra íslensku? Borgarsögusafn býður upp á leiðsögn um Aðalstræti 10 og 16 fyrir fólk sem er að læra íslensku. Leiðsögnin verður laugardaginn 14. nóvember kl. 14:00-15:00. Katleen Abbeel sér um leiðsögnina og segir frá á auðskilinni íslensku.

Sunnudaginn 15. nóvember kl. 14, munu þær Íris Gyða Guðbjargardóttir og Hlín Gylfadóttir, sýningarstýrur sýningarinnar Ólafur K. Magnússon: Á vettvangi leiða gesti um sýninguna. Ókeypis inn og öll velkomin! Talað mál íslenska.

Borgarsögusafn býður upp á táknmálsleiðsögn í Ljósmyndasafni Reykjavíkur um sýninguna Ólafur K. Magnússon: Á vettvangi þann 29. nóvember kl. 14.00. Leiðsögnin er ókeypis og öll sem tala táknmál eru hjartanlega velkomin.

Bráðum koma blessuð jólin er yfirskrift jóladagskrár Árbæjarsafns sunnudaginn 13. desember en þá gefst gestum tækifæri að njóta aðventunnar og upplifa jólin eins og þau voru í Reykjavík í þá gömlu góðu daga. Jólaundirbúningur er í fullum gangi í bænum. Í Árbæ sker fólk út laufabrauð, kembir ull og spinnur garn. Í Hábæ bjóða húsbændur gestum að smakka íslenskt hangikjöt og í Nýlendu tálgar maður skemmtilegar fígúrur úr tré. Kæsta skatan er komin í pottinn í Efstabæ og í Miðhúsum eru prentuð falleg jólakort. Í hesthúsinu í Garðastræti eru hjúin í óðaönn að steypa kerti úr tólgi. Jólahald heldra fólks við upphaf 20. aldar er sýnt í Suðurgötu 7 og í Krambúðinni er kramarhús, konfekt og ýmis jólavarningur til sölu. Kaffiilmur berst frá Dillonshúsi en þar er upplagt að setjast niður fá sér tíu dropa og smá bakkelsi með. Helstu viðburðir: 14:00-16:00 Jólasveinar skemmta gestum á víð og dreif um safnsvæðið og taka þátt í söng og dansi. 14:00 Guðsþjónusta í safnkirkjunni 15:00 Sungið og dansað í kringum jólatréð á torgi safnsins Frítt inn fyrir börn, öryrkja og menningarkortshafa. Aðrir greiða 2.550 kr. Vinsamlegast athugið að dagskráin endar kl. 16 en safnið er opið til kl. 17.