Steingrímur Hermannsson forsætisráðherra með dragdrottningum í sjónvarpssal á kosninganótt, 20 apríl 1991

Ljósmyndasafn

Myndir hans  sem birtar voru í dagblöðunum Tímanum, Vísi, DV (Dagblaðinu Vísi), Fréttablaðinu og á fréttavefnum visir.is, eru ómetanleg heimild um íslenskt þjóðlíf. Sýningin er sett upp á þann hátt að áhorfandinn gengur í gegnum tímann, ef svo má segja. Myndirnar eru sveipaðar tíðaranda hvers skeiðs fyrir og sýna glöggt breytingarnar sem urðu á tímabilinu – hvort sem er á umhverfi eða hinum ýmsu sviðum samfélagsins. 

Horft er á Gunnar sem samferðarmann fólksins sem hann myndaði – fólks hvaðanæva að úr mannlífi líðandi stundar. Tilefnin eru ánægjuleg jafnt sem sorgleg. Einkum eru spor samferðamannsins skýr þegar skoðaðar eru myndir hans af fólki sem stóð í stafni opinbers lífs yfir langt skeið. Nefna má myndir hans af fyrrum forsetum Íslands þeim Vigdísi Finnbogadóttur og Ólafi Ragnari Grímssyni sem spanna upp undir fjögurra áratuga tímabil og hafa því mikið sögulegt vægi. Svo löng kynni ljósmyndara og viðfangs ljá ljósmyndunum auk þess meiri blæbrigði og dýpt.

Frá opinberri heimsókn Englandsdrottningar

Starf fréttaljósmyndarans tekur á jafnt andlega sem líkamlega en eins og góðum fréttaljósmyndara sæmir var Gunnar ávallt mættur þar sem eitthvað fréttnæmt var að gerast og skipti engu á hvaða tíma sólarhringsins það var. Stafræna byltingin í ljósmyndatækni sem varð á starfstíma Gunnars breytti gríðarlega miklu fyrir hann og gerði það að verkum að ekki þurfti lengur að vinna myndir í myrkraherbergi. Álagið út frá ys og þys starfsins hafði fram að því sett mark sitt á Gunnar og varð þessi breyting honum því kærkomin. Hann leit því aldrei til baka, að eigin sögn, enda var fréttaljósmyndun fyrir honum „bara blaðamennska með annað áhald í höndunum en pennann“. Þannig var frásagnargildi ljósmyndarinnar honum mikilvægara en fagurfræðilegt gildi  hennar.



Fyrir Gunnari var fréttaljósmyndun „bara blaðamennska með annað áhald í höndunum en pennann“. 

Þegar Gunnar hóf störf var vinstri umferð við lýði á Íslandi og náði hann myndum af því  þegar hægri umferð var tekin upp 1969. Eftir það rak hvern  atburðinn á fætur öðrum, tónleikar hinnar goðsagnakenndu rokksveitar Led Zeppelin í Laugardalshöll 1970 og svo ári síðar heimkoma fyrstu handritanna í Reykjavíkurhöfn. Gunnar var mættur til Vestmannaeyja fljótlega eftir að hóf að gjósa á Heimaey 1973 og komst í návígi við fleiri náttúruhamfarir – eftirmála snjóflóðanna á Flateyri og í Súðavík – atburði sem reyndu á íslenska þjóðarsál. Heimssögulegir viðburðir fóru heldur ekki framhjá honum eins og kjör Vigdísar fyrsta þjóðkjörna kvenforseta í heimi 1980 og leiðtogafundurinn í Höfða 1986. Allt þetta var vandlega skrásett af Gunnari. 

Þegar gengið er „í gegnum tímann“ á sýningunni birtast okkur einnig tíðarandamyndir sem eru mikilvægur spegill fyrir nútímann. Gullmolar úr tónlistar- og skemmtanalífi undangenginna áratuga auk svipmynda úr kjara- og jafnréttisbaráttu. Á seinni hluta ferilsins náði Gunnar myndum sem í dag eru mjög táknrænar eins og af uppbyggingu Kárahnjúkavirkjunar og spennuþrungnu andrúmslofti í kringum efnahagshrunið 2008. Sumt af því sem Gunnar myndaði, atburðir sem og persónur, öðlast nýja merkingu og annað samhengi þegar það er skoðað í dag vegna  atburðarásar sem það hefur tengst síðar. Dæmi um þetta eru myndir af opinberum persónum úr lagaumhverfinu og viðskiptum. 

Á heildina litið sýna myndirnar glöggt hvernig „gamla Ísland“ færist yfir í æ alþjóðavæddara samfélag. Það er langur vegur á milli bóndans í Reykjavík að stíga með mjólkurbrúsana sína upp í strætó 1979 og mynda sem gefa innsýn inn í eftirmála efnahagshrunsins 2008. Tveir ólíkir pólar sem endurspegla muninn milli einfaldleika og nægjusemi og endalausra valmöguleika nýrri tíma með öllum þeim kostum og göllum sem því fylgja. Það eru áskoranir sem enn í dag halda samfélaginu við efnið og nýjar kynslóðir fréttaljósmyndara takast á við.


Sýningarstjóri: Jóhanna Guðrún Árnadóttir

Gunnar V. Andrésson fæddist í Reykjavík 1950 og starfaði sem fréttaljósmyndari í ríflega fimmtíu ár. Hann hóf ferilinn hjá Tímanum árið 1966 þar sem hann var til 1978. Þaðan fór hann yfir á Vísi og eftir sameiningu Vísis og Dagblaðsins síðla árs 1981 varð hann ljósmyndari DV (Dagblaðsins Vísis) til 2003 þegar starfsemi útgáfufélags Frjálsrar fjölmiðlunar lauk. Þá varð hann ljósmyndari á Fréttablaðinu og fréttavefnum visir.is fram til loka starfsferils síns 2017.


Myndasafn Gunnars frá árunum þegar hann starfaði á DV, Fréttablaðinu og fréttavefnum visir.is auk nokkurra myndataka frá Tímaárunum er varðveitt í Ljósmyndasafni Reykjavíkur


Gunnar V. Andrésson fréttaljósmyndari │Samferðamaður

Á sýningunni "Samferðamaður" er farið yfir ríflega fimmtíu ára feril Gunnars V. Andréssonar fréttaljósmyndara – frá 1966 til 2017.

Gunnar V. Andrésson frétta­ljós­myndari │Sam­ferða­maður

Á sýningunni "Samferðamaður" er farið yfir ríflega fimmtíu ára feril Gunnars V. Andréssonar fréttaljósmyndara – frá 1966 til 2017.

Gunnar V. Andrésson fréttaljósmyndari │Samferðamaður