Hallgerður Hallgrímsdóttir│Landslag (2012)

Ljósmyndasafn

Frá því að Hallgerður Hallgrímsdóttir lauk námi í myndlist með ljósmyndun sem miðil vorið 2011 hefur hún haft í nógu að snúast. Hún hefur tekið þátt í alþjóðlega ljósmyndaverkefninu "European Borderlines" og var valin ein sýnenda á samsýninguna "Fresh Faced + Wild Eyed", sem stóð yfir í The Photographer's Gallery í London nú í september. Einnig mun hún ásamt Páli Stefánssyni ljósmyndara stýra raunveruleikaþætti fyrir ljósmyndara á Skjá Einum sem hefst í byrjun næsta árs.



Á sýningunni "Landslag (2012)" veltir Hallgerður fyrir sér vefmyndavélum og tilgangi þeirra. Í texta segir: „Vélræn augu vefmyndavéla stara á landslag Íslands árið um kring, staðsettar í praktískum tilgangi en síður til að þjóna fagurfræðilegum tilgangi, eins og venja er í landslagsljósmyndun. Stundum geta vélarnar ekki annað en fangað fegurðina sem fyrir þær er lögð en yfirleitt er útsýni þeirra hversdagurinn einn. Viðfangsefni myndavélanna, bæði náttúra og manngert landslag, tekur sífelldum breytingum vegna veðurs, tíma dags og árs. Verkið er samansafn mislangra augnablika, söfnuðum úr hlýju umhverfi heimilis listamannsins, augnablik bjöguð af misgóðum upplausnum, birtuskilyrðum og fyrirfram ákveðnum römmum.“ 



Hallgerður Hallgrímsdóttir (f. 1984) er búsett í Reykjavík. Hún útskrifaðist með BA Honours gráðu í myndlist með ljósmyndun sem miðil (Fine Art Photography) frá Glasgow School of Art vorið 2011. Hallgerður er einnig með BA gráðu frá Listaháskóla Íslands í textíl- og fatahönnun.

Heimasíðu Hallgerðar má sjá [hér](http://hallgerdur.com/).


Hall­gerður Hall­gríms­dótt­ir│­Landslag (2012)

"Landslag (2012)"er yfirskrift sýningar í Skoti Ljósmyndasafns Reykjavíkur með verkum Hallgerðar Hallgrímsdóttur

Hallgerður Hallgrímsdóttir│Landslag (2012)