Kvennafrídagurinn 24. október 1975. Ljósmynd: Sveinn Þormóðsson

Ljósmyndasafn

Í ár eru 50 ár liðin frá því að konur hér á landi lögðu niður launuð sem ólaunuð störf sín og stöðvuðu þannig samfélagið. Kvennafrí var haldið 24. október til að mótmæla margvíslegri mismunun gegn konum á vinnumarkaðnum og vekja athygli á framlagi kvenna til samfélagsins. 

Ljósmyndirnar á sýningunni  eru allar teknar á Kvennafrídeginum sem haldinn var á Lækjartorgi 24. október 1975 en talið er að 25.000 konur hafi sótt fundinn. Líklega er þetta einn stærsti útifundur Íslandssögunnar. Viðburðurinn vakti heimsathygli. 


Kvennafrí var haldið 24. október til að mótmæla margvíslegri mismunun gegn konum á vinnumarkaðnum og vekja athygli á framlagi kvenna til samfélagsins. 

Karólína Rós Ólafsdóttir samdi ljóðið Í augsýn sérstaklega fyrir sýninguna en myndirnar á sýningunni voru henni innblástur við skrifin.



#### Í augsýn 

Fólk fyllir göturnar og ekkert  


sést nema höfuð við höfuð 

samstaðan er hafsjór, ólgandi orka 

skilti og borðar eru fletir á þvöngunni 

skýr skilaboð, handmáluð, hendur 

sem teygja orðin upp, ekki er hægt að lifa


á loftinu einu  

skrifstofurnar tómar

og búðarkassar, fiskikörin frosin í stað

börnin heima að borða pylsur, börnin 

toga í bindishnút, úrillir inni en úti raddir 

sem hrópa  

stígið fram og horfið hátt, rísið upp 

úr fordómamfeninu, 

framtíðin í augsýn! 

Límmiðar og barmmerki á hverri kápu, 

hverri ullarflík, úti raddir 

sem syngja já ég þori get og 

hnefar á lofti, erfiðar spurningar, 

áfram gakk. 

Í augsýn er nú frelsi 

fimmtíu árum síðar og fyrr en varir 

er aftur október og aftur frost á rúðum, 

aftur konur að taka til skilti og reima 

á sig skónna, tími til að minna á 

allt sem þurfti að gerast strax og þarf enn 

þarna úti vilja ýmsir afturábak 

skilja ekki hvað kom áður 

skilja ekki 

að samstaðan er hafsjór, ólgandi alda 

aftur eru steyttir hnefar, aftur söngur 

og aftur stendur þú á útifundi 

Lækjartorgið fullt af hugsjón 

líttu á hópinn, finndu kröfurnar brennandi 

og viljann. Hrópaðu! Lagaðu húfuna 

það er kannnski kalt en það skiptir ekki máli 

dragðu rauðan sokk yfir ökkla, himininn bjartur 

og skiltin segja greinilega, vaknið strax 

vaknið, baráttunni lýkur ekki í dag.


Kvenna­frí­dag­urinn 24. október 1975

Í Skoti Ljósmyndasafns Reykjavíkur stendur nú yfir sýning á ljósmyndum úr safneign af því tilefni af 50 ár eru frá því að konur hér á landi lögðu niður launuð sem ólaunuð störf sín og stöðvuðu þannig samfélagið.

Kvennafrídagurinn 24. október 1975