Ljósmyndasafn

Myndir hans varpa ljósi á tímabilið frá aldamótum 1900 fram undir miðbik 20. aldar og fletta upp svipmyndum frá tímabili er samhliða tækniframförum einkenndist af þjóðfélagsbreytingum og þróun borgarsamfélags í Reykjavík.  

Segja má að Magnús hafi verið ljósmyndari Reykjavíkur en myndir hans hafa veitt okkur einkar fjölþætta sýn á höfuðstaðinn á þessum tíma. Fjöldaframleiðsla stereóskópmynda sem hann innleiddi inn á íslenskan ljósmyndamarkað höfðu víðtæk áhrif á myndsýn þjóðarinnar og nutu þær einnig  vinsælda erlendis þar sem þær vöktu athygli á landslagi og náttúrufegurð landsins.  Einnig varð Magnús fyrstur Íslendinga til að lita stækkaðar ljósmyndir og notaði til þess vatnsliti.   

Segja má að Magnús hafi verið ljósmyndari Reykjavíkur en myndir hans hafa veitt okkur einkar fjölþætta sýn á höfuðstaðinn á þessum tíma. 

Klettagöng í Gjá í Þjórsárdal (Stereóskópmynd) © Borgarsögusafn Reykjavíkur |  Ljósmynd: Magnús Ólafsson

Magnús sem hafði verið verslunarstjóri á Akranesi ákvað árið 1901, þá 39 ára að aldri, að gera áhugamál sitt, ljósmyndun, að lifibrauði sínu.  Sér til undirbúnings hélt hann út til náms í ljósmyndun hjá Peter Elfelt í Kaupmannahöfn, eins helsta ljósmyndara Dana á þessum tíma.  Að lokinni dvöl þar í landi flutti Magnús búferlum til Reykjavíkur og opnaði ljósmyndastofu í Pósthússtræti 16 árið 1901.

Ljósmyndir Magnúsar eru heimildir um merka viðburði er áttu sér stað á fyrri hluta 20. aldar, hvort sem um er að ræða frá Konungsheimsókn 1907 eða frá Kvenfrelsisdeginum 19 júní árið 1919. Einnig tók hann fyrstu loftmyndina af borginni og eftir hann liggja ótal ljósmyndir sem varpa ljósi á Reykjavík á þessum tíma. 

Á þessari yfirlitssýningu verða um 80 ljósmynda Magnúsar sem skipt er í fimm meginflokka; _Portrett, Atvinnulíf, Reykjavík, Landsbyggðin_ og _Atburðir_ og spanna myndirnar feril hans sem ljósmyndara frá árinu 1901 fram til dánardægurs árið 1937.  Sýningin um Magnús fléttar saman bæði sögulegri og listrænnri arfleifð íslenskrar ljósmyndunar og varpar ljósi á hversu mikilvægan þátt hann átti í að skapa þá mynd sem við gerum okkur af Reykjavík og Íslandi í heild sinni í upphafi 20. aldar.


Aðalmynd: Á bæjarhlaði. Grímsstaðir. Karólína Magnúsdóttir leikur á fiðlu, kálfur, hænur, og hundur. Úr einkasafni: Magnúsar Karls Péturssonar og Ingibjargar Magnadóttur. Um 1920.

Magnús Ólafsson│Yfirlitssýning

Magnús Ólafsson (1862-1937) er einn helsti frumherji í íslenskri ljósmyndun og eru verk hans kjölfestan í safneign Ljósmyndasafns Reykjavíkur

Magnús Ólafs­son│Yf­ir­lits­sýning

Magnús Ólafsson (1862-1937) er einn helsti frumherji í íslenskri ljósmyndun og eru verk hans kjölfestan í safneign Ljósmyndasafns Reykjavíkur

Magnús Ólafsson│Yfirlitssýning