Ljósmyndasafn

Bandaríski ljósmyndarinn Mary Ellen Mark var nýverið kjörin áhrifamesti kvenljósmyndari allra tíma af lesendum tímaritsins American Photo. Verk hennar, sem eru mörg hver þau þekktustu í bandarískri ljósmyndasögu, hafa  birst í helstu tímaritum og blöðum heims sem og í fjölda ljósmyndabóka, s.s. Passport, Ward 81, Streetwise og American Odyssey. Mark hefur hlotið fjölda viðurkenninga á ferli sínum, haldið yfir 80 einkasýningar, tekið þátt í yfir 120 samsýningum og miðlað af þekkingu sinni á ótal fyrirlestrum í rúm 30 ár.

"Ljósmyndarinn verður að vera heiðarlegur til að ávinna sér traust fólksins, má þá einu gilda hvort um óþekktan eða frægan einstakling sé að ræða." 

Viðfangsefni Mary Ellen Mark einskorðast að miklu leyti við „óþekktu andlitin”; einstaklinga sem orðið hafa undir í þjóðfélaginu og lifa á útjaðri þess. Mark kýs öðru fremur að koma til skila sögu þessara einstaklinga, viðurkenna og benda á tilvist þeirra með því að gefa innsýn í heim sem flestum er lokaður. 

American Odyssey hefur að geyma yfirgripsmikið safn mynda sem Mary Ellen Mark hefur tekið í Bandaríkjunum undanfarin 36 ár, allt frá árinu 1963 til 1999, og má þar á meðal finna margar af hennar þekktustu myndum. 

Nálgun Mary Ellen Mark er mjög persónuleg og einkennist af virðingu og ríkri samkennd með því fólki sem á vegi hennar verður. Hún kveður aldrei upp dóm yfir því í myndum sínum heldur lætur hvern og einn halda virðingu sinni og lætur aðra um að draga ályktanir. Mark segir sjálf að ljósmyndarinn verði að vera heiðarlegur til að ávinna sér traust fólksins, má þá einu gilda hvort um óþekktan eða frægan einstakling sé að ræða. Einungis með þessu viðhorfi sé hægt að draga fram sérkenni og líðan hvers og eins með jafn miklum sannfæringarkrafti og Mark gerir; meistaralegt samspil lýsingar og rýmis, framsetningar og myndbyggingar hjá Mark eykur enn á áhrifamátt myndarinnar.

Sýningin er er unnin í sérstöku samstarfi við Hasselblad Center í Gautaborg. Styrktaraðilar eru Kodak Professional og Hasselblad. Hún er framlag Ljósmyndasafns Reykjavíkur á Listahátíð Reykjavíkur 2002 í samvinnu við Listasafn Reykjavíkur. 




Mary Ellen Mark │ American Odyssey

Á sýningunni er að finna myndir frá 1963 til 1999 eftir hinn virta ljósmyndara Mary Ellen Mark.