Nökkvi Elíasson og Brian Sweeney │ Eyðibýli 

Ljósmyndasafn

Eyðibýli Nökkva eru svart hvít, fjarræn og drungaleg, en eyðibýli Brians, sem eru í lit, sýnast af þeim sökum einum nær okkur í tíma, virðast jafnvel hafa verið yfirgefin af ábúendum í flýti skömmu áður en ljósmyndin var tekin. En ljósmyndirnar á sýningunni einskorðast ekki við eyðibýli: þar getur að líta samspil óvenjulegrar birtu, stórbrotins landslags og fágætrar myndbyggingar. Afskekktu bæjarhúsin bera við þungbúinn himininn, gera ljósmyndirnar svo áhrifamiklar sem raun ber vitni. 


Nökkvi Elíasson er áhugaljósmyndari búsettur í Reykjavík. Hann byrjaði ljósmyndaferil sinn fyrir um 15 árum, hefur að mestu leyti einbeitt sér að svart/hvítum myndum, og undanfarin 10 ár helgað sig eyðibýlum og öðrum yfirgefnum mannvirkjum. Verk Nökkva hafa birst víða, meðal annars á bókakápum og í dagblöðum. Skemmst er að minnast opnu í Morgunblaðinu í september 1997, sem tileinkuð var ljósmyndum hans af eyðibýlum.

Þetta er fyrsta sýning Nökkva en aftur á móti hefur hann haldið uppi öflugri vefsíðu þar sem er að finna margar af hans bestu myndum. Vefsíðan hefur vakið mikla athygli um allan heim og birti hið virta dagblað New York Times meðal annars grein um síðuna sem sjá má [hér](http://www.islandia.is/~nokkvi/).

Brian Sweeney er Skoti sem starfað hefur við ljósmyndun í tíu ár. Eftir að hafa tekið námskeið í prentlist og hönnun var hann í starfsþjálfun sem ljósmyndari hjá East End Management Agency, sem er þróunarverkefni fyrir ungt fólk í austurhluta Glasgow. Þaðan hélt hann til starfa hjá nokkrum skoskum dagblöðum en flutti síðan til London til að mennta sig frekar í atvinnuljósmyndun við London College of Printing.

Síðan þá hefur Brian birt myndir sínar í nokkrum fremstu tónlistar- og dægurmálatímaritum heims og meðal viðskiptavina hans má nefna fyrirtækin Microsoft og Ford. Hann hefur sýnt verk sín í Glasgow, Manchester og London, og átti verk á sýningu sem haldin var í hinni alræmdu Þúsaldarhvelfingu í London. Brian er nú búsettur á Íslandi ásamt fjölskyldu sinni og starfar við ljósmyndun.

Nökkvi Elíasson og Brian Sweeney │ Eyði­býli

Þessi samsýning samanstendur af á fjórða tug ljósmynda, svart hvítum og litmyndum, teknum af eyðibýlum víðsvegar á Íslandi.

Nökkvi Elíasson og Brian Sweeney │ Eyðibýli