Ljósmyndasafn

Um langt skeið hafa íslenskir ljósmyndarar heillast af íslenskum eyðibýlum. Fókusinn hefur þó oftar en ekki verið á ytra byrði húsanna; á samhengi sjálfra bygginganna við umhverfi sitt og náttúruna. Þar að auki hafa eyðibýlamyndir undanfarinna ára oftar en ekki verið svarthvítar og sveipaðar rómantískri mystík. Í ljósmyndum Orra kveður við annan tón. Þar er áherslan lögð á samband við þann anda og stemmningu sem ríkir innan húsanna, á þá ómetanlegu litapallettu sem verður til þegar óreiðukennt veðurfar vinnur á veggfóðri, málningu og húsgögnum; á að fanga áru hins yfirgefna. 

Orri tekur myndir sínar á stór filmublöð með sáraeinfaldri belgmyndavél og notast eingöngu við þá lýsingu sem er til staðar hverju sinni. Sjálf gjörðin er ekki minna mikilvæg en ljósmyndirnar sjálfar – að mæta einn í yfirgefið hús, oft fjarri öðrum mannabyggðum, og dvelja þar tímunum saman, einn með myndavél og ekkert annað til að skrásetja hverfandi veruleika, skrásetja veðrunina og skrásetja híbýli sem stundum hafa verið yfirgefin með yfirvegun en oft í augljósum flýti.

"Af hverju lagðist þetta hús í eyði? Gerðist það í sorg eða sátt? Af hverju fengu sumir hlutir ekki að fylgja með í flutningunum? Hverjir bjuggu hér og hvar dvelja þeir nú?"

Dvölin kallar fram ótal spurningar: Af hverju lagðist þetta hús í eyði? Gerðist það í sorg eða sátt? Af hverju fengu sumir hlutir ekki að fylgja með í flutningunum? Hverjir bjuggu hér og hvar dvelja þeir nú? Þannig er hver ljósmynd Orra eins konar föngun á tómi og hinu ósvaraða; á hinu yfirgefna einkarými – þetta eru myndir af hlutlægum veruleika sem enn loða við fingraför hins mannlega. Orri hefur sýnt brot af myndunum bæði hér á landi sem og erlendis en nú er sýningin í heild sinni samankomin á Ljósmyndasafni Reykjavíkur. 

Elstu ljósmyndirnar úr þessari myndaröð voru fyrst sýndar haustið 2001, í elsta ljósmyndagalleríi Evrópu, Galleri Image í Árósum. Sýningin fékk lofsamlega dóma í stærsta dagblaði Árósa og vorið eftir var sýninginsett upp í Galleríi Skugga í Reykjavík. Í framhaldinu fóru valdar myndir úr þessum fyrsta hluta verkefnisins á samsýningar í Moskvu, Frakklandi og Serbíu.Orri stundaði nám í ljósmyndun við School of Visual Arts í New York og lauk þaðan BFA-gráðu árið 1996. Hann hefur haldið einkasýningar á Íslandi jafnt sem erlendis. Fyrsta sýningin hans var á Kaffi Mokka árið 1998 þar sem hann sýndi portrett myndir. Myndir Orra hafa einnig birst í tímaritum á borð við Changing Faces, Iceland Review, Big Magazine og Ský, svo einhver séu nefnd.

Orri er ekki við eina fjölina felldur, því auk þess að taka myndir semur hann tónlist. Orri og Dagur Kári  reka tvíeikið Slowblow sem sent hefur frá sér nokkrar plötur auk þess sem þeir hafa  samið og úsett tónlist við allar myndir Dags Kára. Kvikmyndir á borð við Nói Albinói, Voksne Mennesker og The Good Heart. Nú síðast gerðu þeir félagar tónlistina fyrir kvikmyndina Brim eftir Árna Ólaf Ásgeirsson. Orri hefur einnig komið að nokkrum hljómplötum sem upptökustjóri.

Orri │Innviðir

Ljósmyndarinn Orri hefur um árabil myndað íslensk eyðibýli. Sýningin Innviðir gefur að líta yfirlit ljósmynda sem hann hefur tekið allt frá árinu 1999 til dagsins í dag.

Orri │Inn­viðir

Ljósmyndarinn Orri hefur um árabil myndað íslensk eyðibýli. Sýningin Innviðir gefur að líta yfirlit ljósmynda sem hann hefur tekið allt frá árinu 1999 til dagsins í dag.

Orri │Innviðir