Ljósmyndasafn

Ljósmyndasafn Reykjavíkur er 20 ára um þessar mundir og af því tilefni þótti við hæfi að færa borgarbúum afmælisgjöf. Ákveðið varð gjöfin yrði ljósmyndasýning um samtímann og um leið yrði leitað svara við spurningunni: Hver er Reykjavík samtímans? 

Ljósmyndasafn Reykjavíkur sneri sér því til 17 ljósmyndara og bað þá að sýna okkur borgina. Og þeir létu ekki á sér standa; fóru af stað og skutu á samtímann.
Og hver er þessi Reykjavík samtímans?

Er hún kannski, svo vitnað sé í Steinunni Sigurðardóttur „Umfram allt, höfuðborg vindanna / sviptivinda sem teygja gluggaplast nýbygginga / vinda sem sveifla barnlausum rólum,“
(Hugástir: Brotnar borgir II)



Eða

„Borg heitra timburhúsa með sjálflýsandi bárujárnsþök / borg dularfullra steinhúsa frá millistríðsárunum.“
(Hugástir: Brotnar borgir II)

Er nokkur vegur að skilgreina borgina á einfaldan hátt, sér hana ekki hver með sínum augum?
Til dæmis yrkir Óskar Árni Óskarsson: „Krítarteikningar á gangstéttinni og dansandi stjörnur milli háhýsanna.“
(Vegurinn til Hólamvíkur: Útjaðrar, tólf dagbókarbrot)
Og
„Rauðglóandi kvöldsólin lágt á lofti, hundrað rúður loga í Breiðholtinu.“
(Vegurinn til Hólmavíkur: Útjaðrar, tólf dagbókarbrot)


Skáld hafa ort um borgina og hvert og eitt dregið upp sína eigin mynd. Sama máli gegnir um ljósmyndara sem hafa myndað Reykjavík í meira en 150 ár.
En hver er svo Reykjavík samtímans? Því getur verið erfitt að svara. En til þess að einhver sjónarhorn fengjust leitaði Ljósmyndasafn Reykjavíkur, eins og áður sagði, til 17 ljósmyndara og bar upp við þá þessa spurningu. Myndirnar eru nú komnar í hús og hafa verið hengdar upp á vegg. Hér eru svör ljósmyndaranna og sýn þeirra: Margbreytileg ásýnd borgar.

- María Karen Sigurðardóttir, forstöðumaður Ljósmyndasafns Reykjavíkur


- Atli Már Hafsteinsson f. 1977
- Bára Kristinsdóttir f. 1960
- Berglind Björnsdóttir f. 1968
- Brian Sweeney f. 1971
- Einar Falur Ingólfsson f. 1966
- Friðþjófur Helgason f. 1953
- Guðmundur Ingólfsson f. 1946
- Gunnar Svanberg Skúlason f. 1973
- Ilmur Stefánsdóttir f. 1969
- Katrín Elvarsdóttir f. 1964
- Kjartan Þorbjörnsson (golli) f. 1970
- Kristín Hauksdóttir f. 1966
- Kristján Pétur Guðnason f. 1949
- Páll Stefánsson f. 1958
- Ragnar Axelsson (RAX) f. 1958
- Sigríður Kristín Birnudóttir f. 1972
- Sigurþór Hallbjörnsson (Spessi) f. 1956