Soffía Gísladóttur│Vino tinto y agua con gas  

Ljósmyndasafn

Sýning Soffíu Gísladóttur  Vino tinto y agua con gas samanstendur af myndum sem hún tók þegar hún bjó í Madrid á Spáni árið 2008. 

“Ég hafði ákveðnar hugmyndir um Madríd, fannst hún spennandi. Ég hafði ferðast víða um Spán en aldrei komið til Madrídar og var með rómantíska hugmynd um borgina.” 

Á þessu hálfa ári sem hún dvaldi í borginni ferðaðist hún um hana og nærliggjandi bæi með myndavélina. Nánast daglega fór hún út með það að markmiði að leita að þessari rómantísku hugmynd. Á hverju götuhorni eru tapasbarir en þeir eru, eins og alkunna er, stór hluti af menningu Spánverja.  Í íbúðarhverfunum koma nágrannar þar saman, konur og karlar, afar og ömmur og börn á öllum aldri. Soffía kom gjarnan við á tapasbar og pantaði sér „vino tinto y agua con gas“ á milli þess sem hún myndaði það sem fyrir augu bar. 



Afrakstur þessara myndaferða eru innsýn inn í hversdagsleika sem Soffía upplifði – hversdagsleika sem má upphefja með rauðvínsglasi.  Það má því segja að setningin  „vino tinto y agua con gas“ nái að fanga vel þann andblæ sem ríkir á sýningunni. 

Soffía Gísladóttir útskrifaðist með B.A gráðu frá grafíkdeild Listaháskóla Íslands árið 2001 og hafa verk hennar verið sýnd víða bæði á Íslandi og erlendis.


Soffía Gísla­dótt­ur│Vino tinto y agua con gas

"Vino tinto y agua con gas" er yfirskrift sýningar í Skoti Ljósmyndasafns Reykjavíkur með verkum Soffíu Gísladóttur

Soffía Gísladóttur│Vino tinto y agua con gas