Ljósmyndasafn

Á sýningunni Villikettir sýnir myndlistarkonan Sunna Ben brot af sístækkandi ljósmyndasafni sínu. Sunna hefur gengið með myndavél á sér, alla daga og nætur, samfleytt í sjö ár. Á þeim tíma hefur hún lent í allskonar ævintýrum sem hún segir að sér hafi oft tekist nokkuð vel að fanga í myndum.  

Að sögn Sunnu eru myndirnar í miklu uppáhaldi hjá henni. Þær hafa fengið góðar viðtökur á samsýningum, í bókum og blöðum og víðsvegar á Internetinu. Því er vel við hæfi og tímabært að sýna þær opinberlega í einkasýningu í Skotinu í Ljósmyndasafni Reykjavíkur.


Sunna segir: „Ef hægt væri myndi ég sýna allt safnið en það er ómögulegt af ótal ástæðum. Þess í stað hef ég valið myndir sem að mínu mati eru áhrifaríkastar, fyndnastar og þær sem mér þykir vænst um. Ég vona svo að þær sómi sér ágætlega saman."

„Það er í rauninni ekkert ákveðið þema á sýningunni sem hægt er að negla niður, en yfirbragðið er bullandi kæti og kaldhæðnisblendin melankólía – það virðist vera það sem ég sæki helst í.“

Sunna Ben Guðrúnardóttir, býr og starfar í Reykjavík. Hún lauk BA gráðu frá Gerrit Rietveld Academie í Amsterdam, Hollandi árið 2012. Flestar myndirnar teknar hérlendis og í Amsterdam á sjálfvirkar 35mm filmuvélar, flestar á Yashicu T4 Super, Leicu Z2X, Canon Prima mini auk ógrynni af ódýrum vélum sem voru notaðar stöku sinnum. 

Heimasíða Sunnu Ben má sjá [hér](http://www.sunnaben.org/).


Sunna Ben│Villikettir

"Villikettir" er yfirskrift sýningar í Skoti Ljósmyndasafns Reykjavíkur með verkum Sunnu Ben.