Þórdís Erla Ágústsdóttir │Hjartaþræðir: nándin í hversdeginum

Ljósmyndasafn

Hún beinir sjónum að tengslum og tilfinningum á milli einstaklinga. Náttúran er órjúfanlegur hluti af umhverfinu og hefur mótandi áhrif á tilfinningalíf og gjörðir. Til að sýna hversu samofið þetta tvennt er stillir Þórdís Erla fram kraftmiklum stemningum af íslenskri náttúru innan um myndirnar af fólkinu.   

Þórdís Erla hefur myndað fólkið, sem flest er henni náið eða vel kunnugt, yfir löng tímabil. Hún velur stundir úr hversdeginum, lítil augnablik sem segja stærri sögu. 


„Ég dvel löngum stundum með því en þannig næ ég að fanga augnablik sem eru raunsönn og einlæg. Nándin við fólkið sem ég mynda gefur dýpri og merkingarbærari útkomu.“ 

Í gegnum þau mannlegu samskipti sem Þórdís Erla fangar og gerir sýnileg, beinir hún sjónum að kjarna mennskunnar — þörfinni fyrir nánd og raunveruleg tengsl í samfélagi þar sem rafræn samskipti hafa aukið einmanaleika og einangrun. Myndirnar segja sögur af ólíku fólki sem hún hefur sumu fylgt eftir yfir löng tímabil á meðan annað birtist aðeins í einum söguþræði. Sýningin er persónuleg og hverfist um íslenskan veruleika þó umfjöllunarefnið sé ekki einungis bundið við hann.

„Foreldrar mínir koma oft við sögu. Þau búa nú á dvalarheimilinu Grund. Móðir mín hefur glímt við heilabilun um nokkurt skeið. Hún var mitt skjól, minn klettur. Ég er að skrásetja okkar síðustu spor saman, varðveita minningar til að sefa mína eftirsjá og hjartasorg. Ég reyni að halda í tímann með myndrænni skrásetningu, en sé um leið hvernig hann merkir allt og umturnar öllu." 



"Ljósmyndir eru á mörkum heimilda og skáldskapar og á því spennandi svæði vinn ég mína vinnu. Þegar öllu er á botninn hvolft er markmið mitt með sýningunni að draga fram það merkingarbæra í hversdeginum. Nándina sem felst í „því venjulega“ og oft er litið fram hjá – en skiptir öllu máli.“ 

Þórdís Erla Ágústsdóttir  útskrifaðist með BA-gráðu í ljósmyndun frá École Nationale Supérieure de la Photographie í Arles í Frakklandi. Hún lauk MA-prófi í hagnýtri menningarmiðlun frá Háskóla Íslands og prófi í kennslufræðum frá Listaháskóla Íslands. Ljósmyndaverk Þórdísar snúast oft um náttúruna, manneskjuna í víðu samhengi, samfélög og heimili fólks. Hún leggur áherslu á að vinna verkefnin yfir langan tíma, oft yfir 20 ár. 


Þórdís hefur lengst af starfað sem sjálfstætt starfandi ljósmyndari á Ísland og sérhæft sig í að mynda fólk, landslag og viðburði. Þá hefur hún jafnframt kennt ljósmyndun í 15 ár. Þórdís hefur tekið þátt í fjölda sýninga bæði á Íslandi sem og erlendis, einnig hafa myndir hennar verið til umfjöllunar í alþjóðlegum fjölmiðlum, ýmsum tímaritum og bókum og birst víða. Þórdís er einn af stofnendum Félags íslenskra samtímaljósmyndara (FíSL).

Vefsíðu Þórdísar má sjá [hér](https://www.thordiserla.is/index)

- [Instagram](https://www.instagram.com/thordiserla_photography)
- [Facebook](https://www.facebook.com/ThordisErla_Photograpy)

Þórdís Erla Ágústs­dóttir │Hjarta­þræðir: nándin í hvers­deg­inum

Í ljósmyndum sínum leitast Þórdís Erla við að fanga það óáþreifanlega í daglegu lífi fólks inn á heimilum þess og á öðrum stöðum sem eru því mikilvægir.

Þórdís Erla Ágústsdóttir │Hjartaþræðir: nándin í hversdeginum