Tími hjá fjórða bekk í Austurbæjarskóla. Nemendur vinna í skólastofunni. Sennilega náttúrufræði. Stúlka að skrifa um fiðrildi, mars 1970. Ljósmynd: Þjóðviljinn

Árbæjarsafn

_Vaxtaverkir_ er upplifunarsýning með áherslu á sköpun, fræðslu, ímyndunarafl og leikgleði. Gestir fá innsýn í veröld grunnskólabarna í Reykjavík á árabilinu 1898-1974. Í dag þykir flestum sem búa á Íslandi sjálfsagt að öll börn gangi í skóla og finnst jafnvel erfitt að ímynda sér að það hafi ekki verið sjálfsagt. Í rauninni er þó ekki svo langt síðan að menntun taldist til  mannréttinda.  

Sérstöku ljósi er beint að lýðheilsu innan skólakerfisins á tímabilinu en stór skref voru tekin til að bæta heilsu barna. Má þar nefna matargjafir, læknisþjónustu, lýsisgjafir og ljósalækningar fyrir kvefsækin, grannholda og táplítil börn. 

Á sýningunni skapast tækifæri fyrir börn að spegla sig við fortíðina og fullorðnu fólki að minnast þess tíma þegar það sat á námsbekk. 

Hönnun sýningarinnar er í höndum hönnunarteymisins ÞYKJÓ. Allt starf þeirra miðar að því að örva ímyndunarafl og sköpunarkraft barna í frjálsum leik. Með stofnun Krakkaráðs ÞYKJÓ vilja hönnuðir heiðra 12. grein Barnasáttmálans sem hverfist um virðingu fyrir skoðunum barna og að fullorðnir eigi að hlusta og taka mark á þeim. Krakkaráðið er síbreytilegt og að þessu sinni skipa nokkrir bekkir í Ártúnsskóla ráð um sýninguna. Þau eru sérfræðingar í því hvernig er að vera barn í grunnskóla í dag og tók sýningargerðin miklum breytingum eftir aðkomu þeirra.

Laugarnesskóli í Reykjavík, skólabörn í röð við skólabíl, nóvember 1953. Ljósmynd: Sigurhans Vignir 

Sýningin er hönnuð undir formerkjum sjálfbærni og umhverfisverndar. Öll sem komu að sýningunni settu sér háleit markmið í sýningargerðinni en efniviður sem fallið hefur til í starfsemi Borgarsögusafns var nýttur eins og hægt var. 

Sýning byggir á niðurstöðum ítarlegra rannsókna sérfræðinga Borgarsögusafns og styður við hlutverk Árbæjarsafns sem leiðandi afls í söfnun og miðlun efnismenningar sem tengist börnum og barnamenningu.  



#### Á sumardaginn fyrsta verður smiðjan Draumaskólinn kl. 13:00-16:00

#### Í tilefni af opnun sýningarinnar verður blásið til málþings um sýningarhönnun á Árbæjarsafni miðvikudaginn 22. maí kl. 15:00.

Forsíðumynd: Tími hjá fjórða bekk í Austurbæjarskóla. Nemendur vinna í skólastofunni. Sennilega náttúrufræði. Stúlka að skrifa um fiðrildi, mars 1970. Ljósmynd: Þjóðviljinn

Vaxta­verkir

Upplifunarsýningin "Vaxtaverkir" leiðir þig inn í veröld grunnskólabarna í Reykjavík á árabilinu 1898-1974.

Vaxtaverkir