Vestur-Íslendingurinn Wayne Gudmundson hefur um árabil getið sér gott orð fyrir víðáttumiklar landslagsmyndir sínar.  Wayne hóf að taka landslagsljósmyndir í byrjun níunda áratugarins eftir að hafa lagt stund á ljósmyndun í rúm tíu ár. Í bernsku kynntist hann sögunum og hefðunum frá Íslandi í gegnum föðurforeldra sína sem voru í hópi Vesturfaranna. 

Eftir því sem árin liðu og verk hans þróuðust fann Wayne hjá sér löngun til að kanna land forfeðra sinna en hann kom til Íslands í fyrsta skipti árið 1997. Hann tók hér m.a. myndir af Öskju, Herðubreið, Jökulsárlóni og Grímsey en landslag í Norður Dakóta og á Íslandi á það sameiginlegt að vera gríðarlega víðáttumikið. Þetta sama ár setti hann upp sýninguna Heimahagar ásamt hinum góðkunna íslenska ljósmyndara Guðmundi Ingólfssyni og var hún afrakstur ferða þeirra á heimaslóðir hvors annars, Wayne tók myndir á Íslandi og Guðmundur í Norður-Dakóta.  

Myndirnar kalla fram fortíð og framtíð í sömu andrá og í áranna rás hefur á myndum Waynes mátt sjá glögglega þau ummerki sem maðurinn skilur eftir sig í landinu. 

Sjóndeildarhringurinn er ávallt sýnilegur í myndum Waynes. Hann forðast hið stórbrotna og hið upphafna en einbeitir sér þess í stað að veruleika hvers staðar eins og hann er. Fyrst á heimaslóðum sínum í Norður-Dakóta og svo á Íslandi, þar sem hann taldi sig finna eitthvað sem hann hafði ekki uppgötvað áður. Það má því til sanns vegar færa að hann hafi farið og leitað uppruna síns í gegnum ljósmyndunina. Myndirnar kalla fram fortíð og framtíð í sömu andrá og í áranna rás hefur á myndum Waynes mátt sjá glögglega þau ummerki sem maðurinn skilur eftir sig í landinu. Má með sanni segja að honum hafi tekist að fókusera á tilfinningu sína fyrir landinu og leiða sýn sína á það inn um ljósopið, komandi kynslóðum til fróðleiks um fortíðina.

Wayne Gudmund­son│­Sjón­ar­horn

Vestur-Íslendingurinn Wayne Gudmundson hefur um árabil getið sér gott orð fyrir víðáttumiklar landslagsmyndir sínar.

Wayne Gudmundson│Sjónarhorn