Árbæj­arsafn

Leiðsögumaður fer með gesti í öll helstu hús Árbæjarsafns og segir frá sögu þeirra. Leiðsögnin fer að mestu fram á ensku og tekur rúma klukkastund.

Sunnudaginn 30. nóvember kl. 13:00–16:00 verður haldið jólakransanámskeið á Árbæjarsafni undir leiðsögn Blómdísar og jóndísar, blómahönnuða með yfir þrjátíu ára reynslu í faginu. Þátttakendur fá tækifæri til að búa til sinn eigin blómakrans, en allt efni og verkfæri verða á staðnum. Skráning er nauðsynleg en hægt verður að skrá sig á námskeiðið fram að 14. nóvember. Námskeiðsgjald er 15.000 kr. Sendur verður reikningur á þátttakendur sem greiða þarf með 10 daga fyrirvara, eða 20. nóvember. Vinsamlegast skráið ykkur hér: https://outlook.office.com/book/vidburdir_borgarsogusafn@reykjavik.is/s/yVERZd8z8Ue7qm431i6kEQ2?ismsaljsauthenabled Námskeiðið er ætlað öllum aldurshópum en athugið að öll börn verða að vera í fylgd með forráðamanni. Verið velkomin!

Í tilefni fullveldisdagsins þann 1. desember kl. 18-22 efna Árbæjarsafn, Félag harmonikuunnenda í Reykjavík, Heimilisiðnaðarfélag Íslands, Kvæðamannafélagið Iðunn og Þjóðdansafélag Reykjavíkur til fögnuðar á Árbæjarsafni. Frítt inn og öll velkomin! Gestum gefst færi á að kynnast gömlu dönsunum, handverki, harmonikum, kveðskap, þjóðbúningum, þjóðdönsum, þjóðlögum og þeim menningararfi sem iðkaður er af félögunum sem að viðburðinum koma auk þess að kynnast starfi félaganna. Á viðburðinum verða skemmtileg örnámskeið og kynningar þar sem hægt verður að læra að sauma gamla íslenska krosssauminn og gera úr því lítið jólaskraut, læra grunnsporin í þjóðdönsum og kynnast kvæðalögum. Dillonshús verður opið og býður upp á dýrindis veitingar. Í tilefni dagsins hvetjum við gesti til að mæta á þjóðbúning, en hægt verður að fá ráðgjöf varðandi búninganotkun og hvernig koma megi eldri búningum í notkun. Dagskrá: ✨Lækjargata 4 / Neyzlan✨ 18:00-22:00 - Heimilisiðnaðarfélag Íslands ✨Lækjargata 4 / Neyzlan (minna herbergi)✨ 18:30 - Kvæðalagaæfing - Kvæðamannafélagið Iðunn 19:30 - Söngvaka - Kvæðamannafélagið Iðunn ✨Landakot / ÍR húsið✨ 18:00 - Þjóðdansafélag Reykjavíkur – Þjóðdansanámskeið 20:00 - Félag harmonikuunnenda í Reykjavík – Dansleikur ✨Líkn✨ 18:00-22:00 - Myndabás

Bráðum koma blessuð jólin er yfirskrift jóladagskrár Árbæjarsafns sunnudagana 7. og 14. desember en þá daga gefst gestum tækifæri að njóta aðventunnar og upplifa jólin eins og þau voru í Reykjavík í þá gömlu góðu daga. Jólaundirbúningur er í fullum gangi í bænum. Í Árbæ sker fólk út laufabrauð, kembir ull og spinnur garn. Í Hábæ bjóða húsbændur gestum að smakka íslenskt hangikjöt og í Nýlendu tálgar maður skemmtilegar fígúrur úr tré. Kæsta skatan er komin í pottinn í Efstabæ og í Miðhúsum eru prentuð falleg jólakort. Í hesthúsinu í Garðastræti eru hjúin í óðaönn að steypa kerti úr tólgi. Jólahald heldra fólks við upphaf 20. aldar er sýnt í Suðurgötu 7 og í Krambúðinni er kramarhús, konfekt og ýmis jólavarningur til sölu. Kaffiilmur berst frá Dillonshúsi en þar er upplagt að setjast niður fá sér tíu dropa og smá bakkelsi með. Helstu viðburðir: 14:00-16:00 Jólasveinar skemmta gestum á víð og dreif um safnsvæðið og taka þátt í söng og dansi. 14:00 Guðsþjónusta í safnkirkjunni 15:00 Sungið og dansað í kringum jólatréð á torgi safnsins Frítt inn fyrir börn, öryrkja og menningarkortshafa. Aðrir greiða 2.450 kr. Vinsamlegast athugið að dagskráin endar kl. 16 en safnið er opið til kl. 17.